عه‌بدولقادر عه‌بدوڵلاهی

ناسراو بە : مامه‌ قاله‌ی سووتوو

خه‌ڵکی : سووتوو

له ‌دایکبووی : نجنێی ژوورو 1926

کاتی شەهیدبوون : 2012.05.07

شوێنی ماڵاوایی : کۆیە

شوێنی گڵکۆ : کۆیه

چۆنیه‌تی شه‌هیدبوون : نەخۆشی

فەرماندە هێزی شه‌هیدانی وردی

راگه‌یه‌نراوی ده‌فته‌ری سیاسیی حدک به‌ بۆنه‌ی ماڵاوایی یه‌کجاریی سه‌مبولی خه‌بات و وه‌فا، مامه‌ قاله‌ی سووتوو

خه‌ڵکی قه‌درزانی کوردستان!
تێکۆشه‌ران! ئه‌ندامان و سه‌رجه‌م هۆگران و دڵسۆزانی حیزبی دیموکراتی کوردستان!
به‌ داخ و په‌ژاره‌یه‌کی زۆره‌وه‌ راده‌گه‌یه‌نین که‌ ئیواره‌دره‌نگانی دووشه‌ممه‌ 18ی بانه‌مه‌ر(7ی مانگی مای) تێکۆشه‌ری دێرینی حیزبی دیموکراتی کوردستان و که‌سایه‌تیی خه‌باتگێر عه‌بدولقادر عه‌بدوڵلاهی ناسراو به‌ مامه‌ قاله‌ی سووتوو، له‌ ته‌مه‌نی 86 ساڵیدا له‌ شاری کۆیه‌، کۆچی دوایی کرد.
عه‌بدولقادر عه‌بدوڵلاهی ساڵی 1305 له‌ نجنێی ژوورووی ناوچه‌ی بانه، له‌ دایک ببوو. له‌ سه‌رده‌می کۆماری کوردستان دا که‌ لاویکی 20 ساڵه‌ بوو، به‌ هۆی شه‌هید مه‌لابرایمی حیکمه‌ته‌وه‌، حیزبی دیموکراتی کوردستانی به‌ رووگه‌ی خه‌بات و تێکۆشانی خۆی هه‌ڵبژارد. به‌م جۆره‌ مامه‌قاله‌ی سووتوو هه‌ر له‌ گه‌ڵ دامه‌زرانی حیزبی دیموکراتی کوردستان، چاره‌نووسی خۆی له‌ خه‌باتی ئه‌م حیزبه‌ گری دا و له‌و کاته‌وه‌ تا دوا ساتی ته‌مه‌نی، بۆ ماوه‌ی زیاتر له‌ 65 ساڵ، وه‌ک تێکۆشه‌‌رێکی وه‌فادار و نه‌سره‌وتوو، خزمه‌تی حیزبه‌که‌ی و بزووتنه‌وه‌ی رزگاریخوازانه‌ی نه‌ته‌وه‌که‌ی له‌ رۆژهه‌ڵاتی کوردستانی کرد.
له‌ ئاکامی تیکۆشانی بێوچان و شوێندانانی خه‌باتی خاوێن و نه‌ترسانه‌ی مامه‌قاله‌ی سووتوودا، زۆر که‌س نه‌ک هه‌ر له‌ نجنێ و سووتوو و ناوچه‌ی مه‌یدانان، به‌ڵکوو له‌ ناوچه‌کانی ده‌وروبه‌ریش، بوونه‌ ئه‌وینداری نیشتمان و رێگای کوردایه‌تی و حیزبی دیموکراتیان هه‌ڵ بژارد. مامه‌ قاله‌ له‌ مه‌ڵبه‌ندی تێکۆشانی خۆیدا، ببووه‌ سیمایه‌کی دیار که‌ ئه‌ندامانی نهێنی و کادره‌کانی حیزب، راوێژیان له‌ گه‌ل ده‌کرد، رێنوێنیان لێ وه‌رده‌گرت و پشتیان پێده‌به‌ست.
مامه‌قاله‌ی سووتوو، له‌ ده‌یه‌کانی 30 و 40 ی هه‌تاویدا، له‌ گه‌ل هه‌موو شه‌پۆله‌کانی گرتن و راوه‌دوونانی ئه‌ندامانی حیزبی دیموکراتی کوردستان له‌ لایه‌ن ساواکه‌وه، چووه‌ به‌ندیخانه‌ و له‌ سه‌ریه‌ک له‌ سه‌رده‌می ده‌سه‌ڵاتداره‌تیی رێژیمی شایه‌تیدا‌، 6سال و 3 مانگ له‌ سه‌ر کوردایه‌تی و ئه‌ندامه‌تیی حیزبی دیموکرات له‌ زیندان دابوو. به‌ندیخانه،‌ سه‌نگه‌رێکی دیکه‌ی تێکۆشانی ئه‌و مرۆڤه‌ خه‌باتکاره‌ بوو. ئه‌شکه‌نجه‌ و گوشاری جیسمی و رۆحی له‌ به‌ندیخانه‌کانی تاران، ته‌ورێز، قزڵقه‌لعه‌، جه‌ڵدیان، سه‌قز و ورمێ، مامه‌قاله‌ی سووتوویان له‌ سه‌ر رێبازه‌که‌ی سوورتر کرد. ئه‌و که‌ پێشتر له‌ مه‌ڵبه‌ندی تێکۆشانی خۆیدا ببووه‌ ناوێکی ناسراو، به‌ هۆی خۆڕاگری و وره‌ی به‌رز و بڕوای پته‌وه‌وه‌ له‌ به‌ندیخانه‌دا، ناوبانگی ده‌رکرد و رێز و متمانه‌ی به‌ندییه‌کانی بۆ لای خۆی راکێشا. کاتێکیش له‌ به‌ندیخانه‌ هاته‌ده‌ر، جاریکی دیکه‌ بۆوه‌ به‌ پردی پیوه‌ندیی ئه‌ندامان و کادره‌کانی حیزب و تێکۆشان و ته‌شکیلاتی نهێنیی حیزبی دیموکراتی کوردستانی له‌ ناوچه‌ی بانه‌ بووژانده‌وه‌.
مامه‌قاله‌ له کاتی راپه‌ڕینی خه‌ڵکی ئێران ڵه‌ دژی رێژیمی شایه‌تی له ساڵی 1357دا رۆڵێکی چالاکی له‌ رێکخستن و رێنوێنیکردنی خۆپێشاندانه‌کانی خه‌ڵکی ناوچه‌ی بانه دا هه‌بوو. له‌ گه‌ڵ ئاشکرا بوونی تێکۆشانی حیزبی دیموکراتی کوردستان، بوو به‌ پێشمه‌رگه‌ و بێ‌سڵکردن له‌ مردن، ئه‌رک و به‌رپرسایه‌تیی نیزامی و پێشمه‌رگانه‌ی له‌ کۆمیته‌ی شارستانی بانه‌ و هێزی شه‌هیدانی وردیدا گرته‌ ئه‌ستۆ و به‌ڕێوه‌ی برد .له‌ ماوه‌ی ساڵانی 1361ـ1363دا دوو جار به‌ توندی له‌ شه‌ڕ له‌ گه‌ڵ هێزه‌کانی کۆماری ئیسلامیدا بریندار بوو و به‌م هۆیه‌وه‌ لاقێکی له‌ ده‌ست دا. به‌ڵام که‌مئه‌ندامبوونیش مامه‌ قاله‌ی له‌ کۆڕی تێکۆشان دوور نه‌کرده‌وه‌. ئه‌و، خۆی و بنه‌ماڵه‌که‌ی له‌ ریزی تێکۆشه‌رانی مه‌یدانی خه‌بات و له‌ بنکه‌کانی‌پێشمه‌رگه‌ دا مانه‌وه‌، تا له‌ به‌ڕێوه‌بردنی ئه‌رکه ‌قورسه‌کان و له‌ سه‌ختی و ناخۆشییه‌کان و له خۆشی و سه‌رکه‌وتنه‌کاندا، له‌ ریزی هه‌ره‌ پێشه‌وه‌ و له‌ مه‌یدانی ئه‌سلیی خه‌بات دا بن. هاوسه‌ره‌ رووسوور و سه‌ربه‌رزه‌که‌ی، دایه‌ نه‌جیب که‌ له‌ درێژایی 6 ده‌یه‌ خه‌باتی مامه‌قاله‌ و له‌ هه‌ر هه‌لومه‌رجێکدا، پشتیوان، هانده‌ر و یارمه‌تیده‌ری بۆ تێکۆشان بووه‌، وه‌ک دایکی هه‌موو پێشمه‌رگه‌کان و خه‌مخۆری هه‌موو بنه‌ماڵه‌کان و ماڵه‌که‌شی به‌ ماڵی هه‌مووان ده‌ژمێردرێ. ته‌نیا به‌رهه‌می هاوبه‌شی ئه‌و ژن و مێرده‌ نموونه‌یه‌ش، کاک حه‌سه‌نی کوڕیان، به‌ ئیلهام وه‌رگرتن له‌و دایک و بابه‌، له‌وه‌تا ده‌ستی چه‌کی گرتوه‌، وه‌ک پێشمه‌رگه‌ و کادری حیزبی دیموکرات،له‌ سه‌نگه‌ری تێکۆشان دایه‌. مامه‌ قاله‌ به‌و رابردووه‌ پڕشانازییه‌وه‌ و به‌ تایبه‌تمه‌ندییه‌ ئینسانی و کۆمه‌ڵایه‌تییه‌ به‌رزه‌کانی ببووه‌ که‌سایه‌تییه‌کی ناسراو که‌ رێبه‌رانی حیزب و ‌سه‌رتاپای ریزه‌کانی حیزبی دیموکرات و کۆمه‌ڵانی خه‌ڵک خۆشیان ده‌ویست و رێزیان بۆ داده‌نا. ئه‌و، ماندوویی و ناهومێدیی نه‌ده‌ناسی، هه‌موو کاتێک کێوێک له‌ وره‌ و بڕوا و ئیمان بوو و هه‌ر وا که‌ ئه‌و، شانازیی به‌ پێشمه‌رگایه‌تی، کوردایه‌تی و حیزبایه‌تیی سه‌ربه‌رزانه‌ی خۆیه‌وه ده‌کرد، حیزبه‌که‌ی، هاوسه‌نگه‌ران و هاوباوه‌ڕانیشی شانازی به‌وه‌وه ده‌که‌ن.
به‌ کۆچی دوایی مامه‌قاله‌ی سووتوو، نه‌ته‌وه‌ی کورد و نیشتمانه‌که‌مان کوردستان، هه‌روه‌ها حیزبی دیموکراتی کوردستان، یه‌کێک له‌ دێرینترین، پاکترین ، به‌وه‌فاترین و دلسۆزترین خه‌باتکارانی خۆیان له‌ ده‌ست دا. ده‌فته‌ری سیاسیی حیزبی دیموکراتی کوردستان، به‌ بۆنه‌ی کۆچی دوایی ئه‌و نموونه‌ که‌م هاوتایه‌ی خه‌بات و تێکۆشان، له‌ قووڵایی دڵه‌وه‌ سه‌ره‌خۆشی له‌ دایه‌ نه‌جیب،کاک حه‌سه‌نی مامه‌قاله ‌و هه‌موو ئه‌ندامانی بنه‌ماڵه‌ سه‌ربه‌رزه‌که‌یان ده‌کا. هه‌روه‌ها سه‌ره‌خۆشی له‌ هه‌موو ریزه‌کانی حیزبی دیموکرات، تێکڕای تێکۆشه‌رانی نه‌ته‌وه‌که‌مان و سه‌رجه‌م خه‌ڵکی کوردستان ده‌که‌ین. ئێمه‌ به‌داخین که‌ مامه‌ قاله‌ی پێشه‌نگ و گه‌وره‌مان، سه‌ره‌رای زیاتر له‌ 65 ساڵ خه‌باتی بی بێماندووبوون‌‌ و دیتنی به‌ندیخانه‌ و ئاواره‌یی و چێشتنی ئازاری مه‌رگی ده‌یان و سه‌دان هاوخه‌باتی خۆشه‌ویست، به‌ ئاواتی رزگاریی نه‌ته‌وه‌ی کورد له‌ هه‌موو به‌شه‌کانی کوردستان نه‌گه‌یشت. به‌ڵام گیانی به‌رزی ئه‌و نه‌مره‌ دڵنیا ده‌که‌ین که ناو و یادی له‌ حیزبی دیموکرات و له‌ نێو نه‌ته‌وه‌که‌ی دا به‌ زیندوویی و به‌ به‌رزی ده‌مێنێته‌وه‌ و چۆنیه‌تیی ژیان و مردنی سه‌ربه‌رزانه‌ی ئه‌و ده‌بێته سه‌رمه‌شق و مایه‌ی لێ فێربوون بۆ نه‌وه‌کانی ئێستا و داهاتوو.
هه‌زاران سڵاو له‌گیانی پاکی مامه‌ قاله‌ی نه‌مر
به‌رده‌وامی بۆ رێگا پڕشانازییه‌که‌ی و به‌ هیوای وه‌دیهاتنی ئامانجی رزگاریی کوردستان، ئاواتی پیرۆزی مامه‌ قاله‌ی سووتوو و هه‌موو شه‌هیدان و نه‌مرانی خه‌باتی ئازادیخوازانه‌ی نه‌ته‌وه‌که‌مان.
حیزبی دیموکراتی کوردستان
ده‌فته‌ری سیاسی
19ی بانه‌مه‌ڕی 1391
8ی مای 2012