ئایشێ شه‌مسی بورهان

خه‌ڵکی : خانه‌قای پیر محه‌مه‌د

له ‌دایکبووی : خانه‌قا‌ 1959

کاتی شه‌هیدبوون : 2007.10.25

شوێنی شه‌هیدبوون : فینلاند

شوێنی گڵکۆ : خانه‌قای بورهان

چۆنیه‌تی شه‌هیدبوون : نەخۆشی

پله‌ی ته‌شکیلاتی : ئەندام

.

راگه‌یاندنی کۆمیته‌ی فینلاندی حیزبی دێمۆکراتی کوردستان به‌بۆنه‌ی کۆچی دوایی هاوڕێ ئایشه‌ شه‌مسی بورهان 
به‌داخ‌ و که‌سه‌رێکی زۆره‌وه‌ راده‌گه‌یه‌نین که‌ له ‌به‌ره‌به‌یانی رۆژی پێنج شه‌ممه‌، رێکه‌وتی 2007.10.25 پاش نزیک به‌ سێ ساڵ به‌ربه‌ره‌کانی له‌گه‌ڵ نه‌خۆشی شێرپه‌نجه‌، خوشکه‌ ئایشێ شه‌مسی بورهان ژنه‌‌ پێشمه‌رگه‌ی حیزبی دیمۆکراتی کوردستان‌و هاوسه‌ری هاوڕێی به‌ڕێزمان کاک حه‌سه‌ن موسازاده‌ ناسراو به‌ “حه‌سه‌ن ئاشپه‌ز″، له‌ دووره‌وڵات، له‌ نه‌خۆشخانه‌ی ”کاریناکۆتی” شاری ”تورکو”ی وڵاتی فینلاند، له‌ناو خه‌م‌ و په‌ژاره‌یه‌کی زۆری هاوسه‌رو دوو جگه‌رگۆشه‌کانیان، کازیوه‌و کاروان و هه‌روه‌ها دۆستان وئاشنایانی بنه‌ماڵه‌ به‌رێزه‌که‌یان و ژماره‌یه‌کی به‌رچاو له‌ ئه‌ندامان و دۆستانی حیزبه‌که‌مان ، له‌ته‌مه‌نی 48 ساڵیدا، دڵی گه‌وره‌و پڕ له‌ خۆزگه‌و ئاواتی وه‌دی نه‌هاتووی له‌ لێدان که‌وت‌و بۆ هه‌میشه‌ به‌جه‌سته‌ ماڵئاوایی لێکردین. 
هاوڕێ ئایشێ شه‌مسی بورهان، له‌ ساڵی 1959له‌ بنه‌ماڵه‌یه‌کی ئایینی، بنه‌ماڵه‌ی شێخانی بورهان، له‌ گوندی خانه‌قای سه‌ر به‌ ناوچه‌ی پیرمحه‌ممه‌دی بۆکان له‌ دایک بوو. ته‌مه‌نی منداڵی و لاوه‌تی به‌هۆی چه‌ند بنه‌کی بنه‌ماڵه‌که‌یان له‌ ئاوایی خانه‌قا و شاره‌کانی ورمێ و تاران تێپه‌ڕ ده‌کا. ئه‌گه‌رچی خاتوو ئایشه‌ به‌هۆی فه‌رهه‌نگی زاڵ به‌سه‌ر کۆمه‌ڵگای ئه‌وکاتی کوردستاندا ده‌ره‌تانی خوێندنی پێنادرێ، به‌ڵام بۆخۆی به‌ نهێنی هه‌وڵی فێربوون ده‌دا و سه‌ره‌نجام خۆی فێری خویندن و نووسین ده‌کا. 
هاوڕێ ئایشه‌ شه‌مسی بورهان زستانی ساڵی 1983 هاته‌ ناو ریزی تێکۆشه‌رانی حیزبی دیمۆکراتی کوردستانه‌وه‌ و خه‌بات و تێکۆشانی خۆی بۆ ئازادی گه‌له‌که‌ی و بۆ پێکهێنانی کۆمه‌ڵگایه‌کی یه‌کسان له‌ نێوان ژنان و پیاواندا ده‌سپێکرد و له‌ هێزی به‌یان و کۆمیته‌ی شارستانی بۆکان سازمان درا و چه‌کی خه‌بات و تێکۆشانی له‌ شان کرد. ساڵێک دواتر نه‌قڵی نه‌خۆشخانه‌ی 25ی گه‌لاوێژ کرا و له‌ نه‌خۆشخانه‌ شان به‌شانی ده‌سته‌ کچانی پێشمه‌رگه‌و فیداکاری ئه‌و نه‌خۆشخانه‌یه‌ شان ده‌داته‌ به‌ر کار. له‌کاتێک دا که‌ رۆژانه‌ له‌هه‌مو لایه‌کی رۆژهه‌ڵاتی کوردستان پێشمه‌رگه‌ خه‌ریکی گیان به‌خت کردن له‌ ڕێگای پارێزگاری له‌ نیشتمان دا بون و له‌هه‌مولایه‌که‌وه‌ رۆڵه‌ی به‌ ئه‌مه‌گی کورد له‌ به‌ره‌کانی شه‌ڕدا شه‌هیدو بریندار ده‌بوون، خوشکه‌ ئایشێ و پۆلێک له‌ کچانی روسوری دێموکڕات‌ له‌ نه‌خۆشخانه و بنکه‌کانی حیزبی،‌ به‌وپه‌ری پاکی و فیداکاریه‌وه‌‌ به‌ بێ ماندبون ده‌ست له‌ناوده‌ستی براکانیان خه‌ریکی راپه‌راندنی کاری تاقه‌ت پروکێنی نه‌خۆشخانه‌ و بنکه‌کانی حیزب بون. داده‌ ئاێشێ له‌ناویاندا به‌چه‌شنێک چالاک و ئاماده‌ی تێکۆشان بو که هه‌موو‌ پێیان ده‌گوت ئاردی به‌هارو. ساڵی 1986، هاوڕێ ئایشێ له‌ گه‌ڵ هاوڕێی که‌مئه‌ندام کاک حه‌سه‌ن موسازاده‌ ژیانی هاوبه‌ش پێکدێنن و به‌یه‌که‌وه‌ کاری ئاماده‌کردنی خواردن بۆ ئاسایشگای حیزب له‌ گڕه‌دێ به‌ئه‌ستۆ ده‌گرن. هاوڕێ ئایشێ له‌ ماوه‌ی نیزیک به‌ 11 ساڵ پێشمه‌رگایه‌تی و تێکۆشان له‌ ریزه‌کانی حیزبی دیمۆکراتدا، له‌ زۆر بواری جۆراوجۆردا خزمه‌تی کرد و به‌وپه‌ڕی سه‌داقه‌ت و ئیمان به‌ رێبازی حیزبه‌که‌ی، سه‌لماندی که‌ کچانیش له‌ رێگای ئازادی وڵاتدا ده‌توانن وه‌کو براکانیان به‌گژ دوژمنان و داگیرکه‌راندا بچنه‌وه‌. ئه‌و یه‌کێک له‌و ژنه‌ کۆڵنه‌ده‌رانه‌ی کوردستان بوو که‌ تا دوایین ساته‌کانی ژیانی سه‌ری بۆ هیچ زوڵم و زۆریه‌ک دانه‌نواند.
هاوڕێ ئایشه‌ و هاوسه‌ر و هاوسه‌نگه‌ره‌که‌ی سه‌ره‌نجام له‌ ساڵی 1995 له‌ وڵاتی فینلاند گیرسانه‌وه‌ و وێڕای ده‌سپێکردنی ژیانی ئاسایی، پێوه‌ندیان له‌ گه‌ڵ کۆمیته‌ی حیزب له‌م وڵاته‌ گرته‌وه‌ و له‌و ماوه‌یه‌دا خۆی و هاوسه‌ر و سه‌رجه‌م بنه‌ماڵه‌ به‌رێزه‌که‌ی هه‌رده‌م وه‌فادار به‌ رێبازی حیزبه‌که‌یان مانه‌وه‌. 
ته‌رمی پیرۆزی هاوڕێ ئایشێ شه‌مسی بورهان، له‌ سه‌ر داوای خۆی ره‌وانه‌ی کوردستان کرایه‌وه‌ و رۆژی هه‌ینی، 2007.11.01 له‌ گۆرستانی خانه‌قای شێخی بورهان له‌ ناوچه‌ی بۆکان، له‌ناو خه‌م و په‌ژاره‌ی خه‌ڵکی ناوچه‌که‌ و بنه‌ماڵه‌ی به‌ڕێزی شه‌مسی بورهان و موسازاده‌ و ژنان و کچانی تێکۆشه‌ری ئه‌و هه‌رێمه‌ ته‌سلیم به‌خاکی پیرۆزی نیشتمانه‌که‌ی کرا و هه‌ربۆیه‌ش به‌ پێویستمان زانی تا به‌ر له‌ به‌جێگه‌یاندنی ئه‌و داوایه‌ی هاوڕێی تێکۆشه‌رمان، له‌ بڵاوکردنه‌وه‌ی ئه‌م راگه‌یه‌ندراوه‌ خۆبپارێزین. 
کۆمیته‌ی فینلاندی حیزبی دێمۆکراتی کوردستان، به‌ بۆنه‌ی کۆچی ناواده‌ی هاوڕێی ماندوو نه‌ناس و ژنه‌ تێکۆشه‌ری رێگای ئازادی کوردستان، هاوڕی ئایشه‌ شه‌مسی بورهان ، خۆی به‌ خاوه‌نی ئه‌م خه‌مه‌ ده‌زانێ و هاوخه‌می خۆی بۆ 
هاوسه‌ر و جگه‌رکۆشه‌کانی، کازیوه‌ و کاروان دوپات ده‌کاته‌وه‌ و‌ پرسه‌ و سه‌ره‌خۆشی خۆی پێشکه‌ش به‌ بنه‌ماڵه‌ به‌رێزه‌کانی موسازاده‌ و شه‌مسی بورهان ده‌کا. 
به‌ڕێز بێ یادی هاوڕێ ئایشه‌ شه‌مسی بورهان.
حیزبی دیمۆکراتی کوردستان
کۆمیته‌ی فینلاند2007.11.03