عه‌لی كاشف پور

خه‌ڵکی : هۆوه‌سنێ

له‌ دایکبووی : پیرانجیک 1957

کاتی شه‌هیدبوون : 1990.08.15

شۆێنی شه‌هیدبوون : قوونیه . تورکیە

شۆێنی گڵکۆ : قوونیه . تورکیە

چۆنیەتیی شه‌هیدبوون : تیرۆر

ئەندامی کۆمیتەی ناوەندی

عه‌لی کاشفپور ساڵی 1957 له‌ گوندی پیرانجیک له‌ ناوچه‌ی ورمێ له‌ دایک بوو، پاش له‌ دایک بوونی عه‌لی ، بنه‌ماڵه‌که‌یان چوونه‌ گوندی هۆوه‌سنێ سه‌ر به‌ شاری ورمێ . خوێندنی سه‌ره‌تایی هه‌ر له‌و گونده‌ ته‌واو کرد و بۆ درێژه‌دانی خوێندن چوو بۆ ورمێ ، ناوبراو هه‌تا وه‌رگرتنی دیپلۆم هه‌ر له‌ شاری ورمێ درێژه‌ی به‌ خوێندن دا . پاش وه‌رگرتنی دیپلۆم له‌ کۆنکووری سه‌رتاسه‌ری به‌شداری کرد و له‌ زانستگای ته‌ورێز له‌ به‌شی کۆمه‌ڵناسی قبووڵ بوو. دوای ساڵێک ناوبراو دیسان به‌شداری کۆنکووری سه‌رتاسه‌ری کرد و له‌ زانستگای تاران له‌ به‌شی حقووقی سیاسی وه‌رگیرا و پاش چووار ساڵ خوێندن له‌ زانستگای تاران ، ساڵی 1978 که‌ سه‌ر هه‌ڵدانی خه‌ڵک له‌ ئێران دژی رژیم ده‌ستی پێکرد ، وه‌ک هه‌موو کوردێکی نیشتیمان په‌روه‌ر که‌ تێکه‌ڵاوی ئێش و ئازاری کۆمه‌ڵانی خه‌ڵک بوو و هه‌ستی به‌ چه‌وسانه‌وه‌ ده‌کرد ، زۆر چالاکانه‌ به‌شداری خۆپێشاندانه‌کانی ده‌کرد و خه‌ڵکی دژی رژیم هانده‌دا. کاک عه‌لی کاشفپور چه‌ندین جار له‌ لایه‌ن کاربه‌ده‌ستانی ساواک به‌ تاوانی بوونی هه‌ستی کوردایه‌تی و رووناکبیرێ‌وه‌ خرایه‌ نێو سیاچاڵه‌کانی رژیمی گه‌نده‌ڵی پاشایه‌تی، و ئه‌ویش یه‌کێک له‌و که‌سانه‌ بوو که‌ نه‌ ته‌نیا زه‌بر و زه‌نگ و ئازار و ئه‌شکه‌نجه‌ به‌ چۆکی دا نه‌هێنا ، به‌ڵکوو ئه‌و ئازار و ئه‌شکه‌نجانه‌ بوونه‌ هه‌وێنی خۆراگری و به‌ربه‌ره‌کانی له‌ به‌رامبه‌ر ساواکی دڵ ره‌ش و بێ به‌زه‌ و کورد کوژی رژیمی په‌هله‌وی. دوژمن که‌ زانی چی لێ هه‌ڵناوه‌رێ ئازادی کرد ، به‌ڵام به‌ نهێنی هه‌ر له‌ ژێر جاوه‌دێری ساواک و ده‌ست و پێوه‌نده‌کانی دا بوو . 
به‌ دووای رووخانی رژیمی پاشایه‌تی و هاتنه‌ کایه‌ی ئازادی و تێکۆشانی به‌ر بڵاوی تێکۆشه‌رانی خه‌ڵک له‌ سه‌رانسه‌ری ئێران و به‌ تایبه‌تی له‌ کوردستان و هاتنه‌ کایه‌ی حزب و رێکخراوه‌کانی سیاسی له‌ سه‌رانسه‌ری ئێراندا و خۆسازماندانی تێکۆشه‌ران له‌ نێو ئه‌حزابی سیاسی دا، کاک عه‌لی کاشفپور وه‌ک هه‌موو تێکۆشه‌ر و کوردێکی دڵسۆز و به‌ له‌ به‌رچاو گرتنی ئه‌و هه‌موو زوڵم و زۆرێی که‌ له‌ زه‌مانی ده‌سه‌ڵات داری شا ساواک به‌ سه‌ر کوردیان هێنابوو ، بڕیاری دا که‌ بۆ درێژه‌ دان به‌ خه‌بات و وه‌ده‌ست هێنانی ماڤی ره‌وای گه‌له‌که‌ی و رزگاری کورد له‌ چه‌وسانه‌وه‌ ببێته‌ ئه‌ندامی حیزبی دیمۆکراتی کوردستان. ساڵی 1978 وه‌ک زۆربه‌ی شۆڕشگێڕانی کورد لیباسی پیرۆزی پێشمه‌رگایه‌تی له‌ به‌ر کرد و هه‌ستی به‌ به‌رپرسایه‌تێکی قورس ده‌کرد و به‌ ته‌واوی وجووده‌وه‌ هه‌وڵی بۆ ده‌دا و له‌و رێگایه‌ش دا به‌ شاهیدی هه‌موو که‌س یه‌کێک له‌ باشترین و به‌ ئه‌مه‌گترین و دڵسۆزترین و سادقترین ئه‌ندامی حیزب بوو له‌ ناوچه‌ی ورمێ و له‌ نێو کۆمه‌ڵانی خه‌ڵکیش دا به‌ خۆش نێو و تێکۆشه‌رێکی کورد نێو بانگی ده‌رکردبوو و ببوو به‌ جێگای باوه‌ر و متمانه‌ی خه‌ڵک و زۆربه‌ی کێشه‌ کۆمه‌ڵایه‌تی و ناوخۆیه‌کانی به‌ بیر و هزرێکی شۆڕشگیڕانه‌وه‌ چاره‌سه‌ر ده‌کرد. کاک عه‌لی له‌ ماوه‌یه‌کی کورت دا توانی کۆمه‌ڵێکی به‌رچاو له‌ خه‌ڵکی ناوچه‌ بێنێته‌ نێو رێزی حیزبی دیمکراتی کوردستان و هه‌ستێکی شۆڕشگێڕی و نیشتیمانپه‌روه‌ری له‌ نێو خه‌ڵک دا په‌ره‌ پێ بدا . 

کاک عه‌لی کاشفپور، سه‌ره‌ڕای وه‌ی که‌ له‌ باری سیاسێوه‌ کادرێکی به‌ ئه‌زموون و لێهاتوو بوو، پێشمه‌رگه‌یه‌کی قاره‌مانی مه‌یدانه‌کانی شه‌ڕ به‌ دژی دوژمنانی ئازادی و کۆنه‌په‌ره‌ستی بوو، هیچ کات ئیجازه‌ی به‌ خۆی نه‌ده‌دا که‌ ، مه‌سئولییه‌ت به‌رچاوی بگرێ و به‌ شێوه‌یه‌کی غه‌ڵه‌ت که‌ڵکی لێوه‌ربگرێ ، هه‌میشه‌ خۆی به‌ چووکترین پێشمه‌رگه‌ و خزمه‌تگوزاری خه‌ڵک و پێشمه‌رگه‌ داده‌نا ، هه‌ر ئه‌و ئاکار و کرده‌وه‌ی به‌رزی ناوبراو بوو که‌ زیاتر هیمایه‌کی پیاوانه‌ و شۆڕشگێڕانه‌ی به‌ کاک عه‌لی به‌خشیبوو و هه‌موو که‌س له‌ گه‌وره‌ و چووکه‌وه‌ رێز و ئیحتڕامی تایبه‌تیان بۆ داده‌نا. 
ساڵی 1979 له‌ کۆنگره‌ی چواری حیزبی دێموکراتی کوردستان که‌ له‌ شاری مه‌هاباد به‌ڕێوه‌ چوو ، کاک عه‌لی به‌ هۆی لێهاتوویی و لێزانی و هه‌ست و بیری شؤرشگێڕانه‌ی که‌ هه‌یبوو ، وه‌ک جێگری کومیته‌ی ناوه‌ندی دیاری کراو ، دوای گه‌ڕانه‌وه‌ی بۆ ناوچه‌ی شوومالی کوردستان چالاکانه‌تر له‌ جاران کار و ئه‌رکه‌کانی پێ‌ئه‌سپێردراوی کۆنگره‌ی 4ی به‌و په‌ڕی ئیمان و له‌خۆبوردوویه‌وه‌ به‌ڕێوه‌ ده‌برد و رۆژ ده‌گه‌ڵ رۆژ ئه‌ندامانی حیزب له‌ ناوچه‌که‌ دا کار و تێکۆشانیان په‌ره‌ی ده‌ستاند و، داگیرکه‌رانی کوردستان وه‌خۆکه‌وتن و به‌ فرۆکه‌ بۆمب هاوێژه‌کانیان گوندی ” ئاخچه‌قه‌لعه‌ ” ی سه‌ر به‌ شاری ورمێ یان بۆمباران کرد ، که‌ بوو به‌ هۆی بریندار بوونی کاک عه‌لی کاشفپور . به‌ڵام به‌ خۆشێوه‌ زۆری نه‌خایاند که‌ برینه‌که‌ی چاک بۆوه‌ و نه‌ته‌نیا وره‌ی دانه‌به‌زی ، به‌ڵکوو دڵخۆشکه‌ر و هانده‌ری کادر و پێشمه‌رگه‌کانیش بوو که‌ له‌ سه‌ر کاره‌کانی خۆیان سوور بن و ئه‌رکه‌کانی خۆیان به‌ باشی به‌ڕێوه‌ به‌رن. ساڵی 1981 له‌ کۆنگره‌ی پێنجی حیزبی دێموکراتی کوردستان دا کاک عه‌لی بۆ به‌ کومیته‌ی ناوه‌ندی و به‌رپرسایه‌تی فێرگه‌ی له‌ باری سیاسێوه‌ له‌ ناوچه‌ی ورمێی پێ ئه‌سپێردرا ، زۆر به‌ باشی و رێک و پێکی کاره‌کانی به‌ڕێوه‌ ده‌برد و زۆر که‌س له‌ ژێر چاوه‌دێری ناوبراو دا په‌روه‌رده‌ بوون و له‌ نێو حیزب دا پێگه‌یشتن و هیندێکیشیان به‌ داخه‌وه‌ شه‌هید بوون و مه‌رگ مه‌ودای نه‌دا زیاتر خزمه‌تی نه‌ته‌وه‌که‌یان بکه‌ن. کاک عه‌لی ساڵی 1987 له‌ لایه‌ن حیزبه‌وه‌ ناردرا بۆ فه‌رانسه‌ و بۆ ماوه‌ی مانگێک له‌وێ بوو و پاشان گه‌ڕاوه‌ بۆ کوردستان و ده‌یگووت : بستێک خاکی کوردستان ، هه‌مووی ئوروپا دێنێ و ژیانی پێشمه‌رگایه‌تیش ، گه‌وره‌ترین شانازییه‌ که‌ به‌ نسیبی هه‌موو که‌س نابێ. 

ناوبراو که‌ قاڵبووی کوره‌ی خه‌بات و به‌ربه‌ره‌کانی ده‌گه‌ڵ زوڵم و زۆر و چه‌وسانه‌وه‌ بوو له‌ فه‌رانسه‌ش هانی نه‌داو له‌ خۆپێشاندانه‌کانی دژی رژیمی کۆماری ئیسلامی به‌شداری چالاکانه‌ی هه‌بوو . کاک عه‌لی کاشفپور هه‌تا کاتی شه‌هید بوونی شه‌ڕه‌فی ئه‌ندامێتی کومیته‌ی ناوه‌ندی حیزبی دیمۆکراتی کوردستانی هه‌بوو ، دوای هه‌ڵوێستگرتنی رێبه‌رایه‌تی شۆڕشگێر یه‌کێک له‌و که‌سانه‌ بوو که‌ هه‌ڵوێستی گرت و به‌ دوای ده‌ست به‌ کار بوونه‌وه‌ی دووباره‌یان دیسان بۆوه‌ به‌ به‌رپرسی شوومالی کوردستان و هه‌ر وه‌ک جاران به‌ ئیمانه‌وه‌ درێژه‌ی به‌ کار و باری سیاسی و نیزامی له‌ ناوچه‌ دا ، ساڵی 1990 به‌ هۆی گیر و گرفتی بنه‌ماڵه‌ که‌ له‌ تورکیه‌ بۆیان هاتبوو پێش رێبه‌رایه‌تی حیزب داوای لێکرد که‌ به‌ هانای بنه‌ماڵه‌که‌یه‌وه‌ بچێ و له‌و گرفته‌ رزگاریان بکا ، به‌ڵام رازی نه‌ده‌بوو که‌ حیزب به‌ جێ بێڵێ ، به‌ڵام پاشان رازی بوو که‌ بچێ و رزگاریان بکا و بۆ خۆی به‌ زوویی بگه‌ڕێته‌وه‌ نێو حیزب ، دوای ماوه‌یه‌ک که‌ دوژمنی به‌دفه‌ڕ هه‌میشه‌ له‌ هه‌لێک ده‌گه‌ڕێ بۆ زه‌ربه‌ وه‌شاندن، به‌ هۆی جاش و سیخوڕه‌کانێوه‌ ئاگادار ده‌کرێته‌وه‌ که‌ ئه‌وه‌ی لێی ده‌گه‌ڕێن لێره‌یه‌ ، به‌داخه‌وه‌ شه‌وی 1990.08.15 له‌ شاری قوونیه‌ 3 که‌س به‌ جل و به‌رگی پۆلیسی تورکی ده‌چنه‌ ماڵه‌ کاک عه‌لی و به‌ زۆر له‌ ماڵی دێننه‌ ده‌ر و له‌ پێش چاوی ژن و منداڵی به‌ لێدان و راکێشان ده‌گه‌ڵ خۆیان ده‌یبه‌ن و دوای ماوه‌یه‌ک به‌ ده‌ست و چاوی به‌ستراو که‌ هه‌موو له‌شی له‌ ژێر شکه‌نجه‌و ئازار دا شێوا بوو شه‌هیدیان کردو له‌ سه‌ر جاده‌ی قوونیه‌ و ئانکارا فڕێیان دابوو.ئه‌و کرده‌وه‌ دڕندانه‌یه‌ له‌ لایه‌ن تیرۆریستانی ئێران و بێگومان به‌ هاوکاری میتی تورکی به‌ڕێوه‌ چوو که‌ خه‌سارێکی گه‌وره‌ له‌ جووڵانه‌و به‌ تایبه‌تی شوومالی کوردستان که‌وت. بێگوومان کاک عه‌لی ئه‌وه‌ڵین و ئاخرین که‌س نابێ که‌ له‌ پێناو گه‌له‌که‌ی دا گیانی خۆی فیدا ده‌کا، به‌ڵام هه‌تا که‌سێکی دیکه‌ ئاوا به‌م شێوه‌یه‌ په‌روه‌رده‌ ده‌بێ و جێگای ناو براو ده‌گرێته‌وه‌ مه‌ودایه‌کی زۆری ده‌وێ ، هه‌ربۆیه‌ ده‌بێ دیسان بڵێم حه‌یف و مخابن شه‌هید بوو و به‌ ئاواتی خۆی نه‌گه‌یشت و حیزبی دیمۆکراتی کوردستان رۆڵه‌یه‌کی به‌ ئه‌مه‌گ و هه‌ڵکه‌وتووی له‌ده‌ست داو ناوچه‌ی شوومالی کوردستانیش هه‌میشه‌ شانازی به‌ جێ پێی کاک عه‌لی کاشفپوره‌وه‌ ده‌که‌ن. پیرۆز بێ یاد و بیره‌وه‌ری شه‌هیدانی کوردستان برووخێ رژیمی کۆنه‌په‌ره‌ست و تیرۆریست په‌روه‌ری کۆماری ئیسلامی ئێران .
,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,

یادێک له‌ تێکۆشه‌ری رێگای رزگاریی کوردستان،کاک عه‌لی کاشف‌پوور

هه‌ژده‌ ساڵ له‌ مه‌وبه‌ر له پازده‌ی ئاگۆستی 1990 دا، تێکۆشه‌ری ناوداری گه‌له‌که‌مان کاک عه‌لی کاشفپوور ئه‌ندامی کۆمیته‌ی ناوه‌ندی حیزبی دێموکڕاتی کوردستان،
به‌ پێی به‌رنامه‌یه‌کی‌ دارێژراو له‌لایه‌ن ‌تیرۆریسته‌کانی کۆماری ئیسلامی ئێران، به‌شێوه‌یه‌کی دڕندانه‌ له‌شاری ” کونیه‌ی” وڵاتی تورکیه‌ تیرۆر کرا و گیانی فیدای ئازادی گه‌ل و نیشتمان کرد.
ئه‌گه‌ر مرۆڤ بیهه‌وێ باس له‌ که‌سایه‌تی کاک عه‌لی بکات، پێویسته‌ پێش هه‌موو شتێک باس له‌ هه‌ل و مه‌رجێک بکات که‌ ئه‌و کات که‌سایه‌تی سیاسی کاک عه‌لی سه‌ری تێدا هه‌ڵدا و پێی نا یه‌ قۆناخی خه‌باتی سیاسی نه‌ته‌وه‌یی.
کاک عه‌لی له‌ هه‌ل و مه‌رجێکدا هاته‌ مه‌یدانی خه‌بات، که‌ بۆ‌ ناوچه‌ی شیمالی کوردستان وه‌ک هه‌ڵقوڵانی کانیاوێکی سارد له‌ مه‌زرایه‌کی قاقڕ و ڕووانی گوڵێک له‌ده‌شتێکی وشک و بێ ئاو دا وا بوو.
کاک عه‌لی له‌ کۆمه‌ڵگایه‌کدا هاته‌ مه‌یدانی خه‌بات که‌ که‌سایه‌تی مرۆڤه‌کان له‌و کۆمه‌ڵگایه‌دا به‌ پێوانه‌ی عه‌شیره‌تی و گه‌وره‌یی بنه‌ماڵه‌ هه‌لده‌سنگێندرا و به‌و ‌عه‌یاره‌ له‌ مه‌حه‌ک ده‌دران. به‌ڵام که‌سایه‌تی به‌رزو خه‌باتکارانه‌ی وی ئه‌و مێعیارانه‌ی گۆڕی. هه‌رچه‌ند ئه‌و نه‌ کوڕه‌ سه‌رۆک عه‌شیره‌ت بوو و نه‌ له‌ بنه‌ماڵه‌یه‌کی ده‌ست رۆیشتووی مه‌ڵبه‌نده‌که‌ له‌ دایک ببوو به‌ڵام یه‌کێک له‌ که‌سایه‌تییه‌ شۆڕشگێڕ وسیاسییه‌کانی ناوچه‌ و یه‌کێک له‌و که‌سانه‌ بوو که‌ جێگا په‌نجه‌و کارتێکه‌ری له‌ ره‌وتی رووداوه‌کانی سیاسی ناوچه‌دا‌ به‌ته‌واوی دیار بوو. رووحی به‌رز و سه‌رکه‌شی ئه‌و به‌ پێوه‌رێکی دیکه‌ ئه‌ویش هه‌ڵسه‌نگاندنی مرۆڤه‌کان نه‌ به‌ مێعیاری باو له‌و کۆمه‌ڵگایه‌دا، به‌ڵکوو به‌ مێعیاری پێشکه‌وتووی مافی یه‌کسان بۆ هه‌موو ئه‌و که‌سانه‌ که‌ له‌ کۆمه‌ڵگادا ده‌ژین، هه‌ڵس و که‌وتی ده‌کرد.
عه‌‌لی ئه‌و خو‌ێندکاره خوێن گه‌رم و شۆڕشگێڕه‌ بوو که‌ له‌ گه‌ڵ سه‌رهه‌ڵدانی چرۆی خه‌باتی گه‌لانی ئێران به‌‌ مه‌به‌ستی رووخاندنی حکوومه‌تی پاشایه‌تی، سه‌ره‌ڕای به‌شداری له‌و خه‌باته، ‌ رێگای خه‌باتی بۆ ر‌زگاری گه‌لی کورد و نیشتمانه‌که‌ی کوردستان هه‌ڵبژارد. ئه‌و کات ئه‌و ساڵی ‌4ی حقوقی سیاسی دانشگا بوو و سه‌ره‌ڕای ئه‌وه‌ی که‌ داهاتوویه‌کی روونی شه‌خسی چاوه‌ڕوانی بوو، به‌ڵام خه‌بات بۆ ر‌زگاری گه‌ل و نیشتمان له‌سه‌رووی هه‌موو ئاوات و چاوه‌ڕوانییه‌کانی وی بوو، بۆیه‌ زانستگای به‌جێ هێشت و بێ راوه‌ستان بۆ به‌شداری له‌ خه‌باتی گه‌له‌که‌ی گه‌ڕاوه‌ زێدی خۆی کوردستان و هه‌موو ئاوات وئامانجه‌ شه‌خسییه‌کانی فیدای ئه‌ورێگایه‌ کرد.
ئێستا هاسانه‌‌ چ به‌ کوتن و چ به‌ نووسین باس له‌ هه‌ل و مه‌رجی ئه‌و کاتی خه‌بات له‌ ناوچه‌ی باکوو‌ری کوردستان بکه‌ین، به‌ڵام گرینگ ئه‌وه‌یه‌ مرۆڤ بتۆانێ‌ به‌کرده‌وه‌، خۆی له‌ گۆڕه‌پانی واقیعی رووداوه‌کانی ئه‌وکاتی ناوچه‌که‌داببێنێته‌وه‌، واقیعێک که‌ سیستمی عه‌شیره‌تی تا ئه‌و کاتیش به‌سه‌ر بیرو مێشکی ئه‌گه‌ر نه‌ڵێین زۆربه‌، به‌ڵام به‌شێکی به‌رچاو له‌ خه‌ڵکی ناوچه‌دا زاڵ بوو. مه‌یدانی دیدی قازانج و به‌رژه‌وه‌ندییه‌ نه‌ته‌وه‌ییه‌کان به‌رته‌سک و زۆر جار خۆی له‌ چوارچێوه‌ی قازانجی بنه‌ماڵه‌ی سه‌رۆک عه‌شیره‌تدا، ده‌د‌یته‌وه. راست له‌و هه‌ل و مه‌رجه‌دا بوو که‌ کاک عه‌لی و ژوماره‌یه‌ک نوخبه‌ی ده‌سته‌ برای کاک عه‌لی هاتنه‌ مه‌یدانی خه‌باتی نه‌ته‌وه‌یی و به‌ هه‌ڵس و که‌وتی ورد و هه‌مه‌لایه‌نه‌ له‌ گه‌ڵ هه‌ل و مه‌رجی زاڵ به‌رسه‌ر ناوچه‌ وه‌ک مۆم داگیرسان و به‌‌ سووتان و فه‌وتان خۆیان‌ فیدا و ئاسمانی ته‌ماوی ئه‌و کاتی ناوچه‌یان رووناک و هیوای ئازادی و سه‌ربه‌ستیان خسته‌ ناودڵی خه‌ڵکی ئه‌و ده‌ڤه‌ره‌‌.
کاک عه‌لی و ده‌سته‌ براکانی هاوبیری ده‌یانزانی که‌ هاتنه‌ مه‌یدانی خه‌بات بۆوان له‌و ناوچه‌یه‌ گه‌لێک دژوار و چه‌توونه‌، ده‌یانزانی که‌ پێویستیان به‌ خه‌باتی هاوکات له‌ چه‌ند به‌ره‌داهه‌یه‌، به‌ره‌ی خه‌بات دژی کۆماری ئیسلامی بۆ نه‌ هێشتنی زوڵمی چه‌ندقاتی نه‌ته‌وه‌یی و جیاوازییه‌ کۆمه‌ڵایه‌تییه‌کان و هه‌روه‌ها خه‌بات دژی بیری پاشکه‌وتووی عه‌شیره‌تی له‌ ناوخۆدا که‌ ئه‌ویش به‌ نۆبه‌ی خۆی زه‌ربه‌ی له‌ گه‌شه‌ کردنی خه‌باتی نه‌ته‌وه‌یی ده‌دا، بۆیه‌ ئه‌وان رێگایه‌کی گه‌لێک سه‌خت‌تریان له‌ شۆڕشگێرانی ناوچه‌کانی دیکه‌ گرته‌ به‌ر و بۆ ئه‌و مه‌به‌سته‌ش مایه‌ی گه‌لێک گه‌و‌ره‌یان دانا. 
من سه‌ره‌تای هاوینی 1980 کاتێک بۆ راپه‌ڕاندنی ئه‌رکی حیزبی چوومه‌ ئه‌و ناوچه‌یه‌، شانازیی ئاشنایه‌تی له‌ ‌ گه‌ڵ کاک عه‌لی و ژوماره‌یه‌ک له‌ رووناکبیره‌ به‌ کرده‌وه‌کانی ئه‌و ناوچه‌یه‌م به‌ نسیب بوو. هه‌ر له‌ ده‌ست پێکی کاردا بۆم ده‌رکه‌وت که‌ ئه‌وان بێهڕه‌نگییه‌کانی ئه‌و ناوچه‌یه‌ن و کتێب به‌ ده‌ستێکه‌وه‌ بۆ ‌‌‌وشیار کردنه‌وه‌ و بردنه‌ سه‌ری زانیاری خه‌ڵکی ناوچه‌ تێده‌کۆشن و چه‌ک به‌ ده‌سته‌که‌ی دیکه‌وه‌ بۆ وه‌ده‌ست هێنانی مافی نه‌ته‌وایه‌تی ئه‌و گه‌له‌ دژی داگیر که‌رانی ئه‌و خاک‌و ئاوه‌‌ خه‌بات ده‌که‌ن.
کاک عه‌لی مرۆڤێکی نه‌ته‌وه‌یی یه‌کسانیخواز، ریئالیست، ، رادیکاڵ و واقیع بین بوو.
ئه‌و کوڕه‌ زه‌حمه‌تکێشێکی ئه‌و ده‌ڤه‌ره‌‌ بوو که‌ به‌ ته‌واو ی هه‌ستی به سته‌می نه‌ته‌وه‌یی باڵ کێش به‌سه‌ر گشت چین و توێژه‌کانی‌ ناوچه‌ و هه‌روه‌ها سته‌می کۆمه‌ڵامه‌یه‌تی که‌ نیزیک به‌ ته‌واوی توێژی زه‌حمه‌تکێشی ناوچه‌ی ئازار ده‌دا، ده‌کرد. ر‌زگاری له‌ ده‌ست سته‌می نه‌ته‌وایه‌تی و یه‌کسانی ‌ کۆمه‌ڵایه‌تی هه‌و‌‌ێن و مایه‌ی ئه‌سڵی هرز و بیری ئه‌و خه‌باتکاره‌ بوو.
حه‌ساس بوونی هه‌ل و مه‌رجی ناوچه‌که وایده‌ویست که‌ ئه‌و زۆر ژیرانه‌ له‌ گه‌ڵ واقیعی وه‌زعه‌که‌ هه‌ڵس و که‌وت بکا‌، ئه‌‌و ده‌یزا‌نی که‌ ده‌بێ رۆڵ و سیاسه‌تێکی ئه‌وتۆ بلێزێ که‌ له‌ کاتێکدا بۆ ده‌سته‌به‌ر کردنی مافی زه‌حمه‌تکێشانی ناوچه‌ و کز کردنی بیری عه‌شیره‌تی تێده‌کۆشێ کا‌‌رێکیش بکات که‌ له‌ توانا و کارامه‌یی‌ سه‌رۆک عه‌شیره‌ت و تێکۆشه‌رانی هێڵی نه‌ته‌وایه‌تی ئه‌و تۆێژه‌ بۆ به‌ره‌و پێش بردنی خه‌باتی نه‌ته‌وایه‌تی ئه‌وپه‌ڕی که‌ڵکی وه‌رگرتبێ. کاک عه‌لی له‌و باره‌وه‌ زۆر به‌ وشیاری هه‌نگاوی هه‌ڵده‌گرته‌وه‌ و هه‌وڵی ده‌دا که‌ ئه‌و سیاسه‌ته‌ هاوته‌ریب به‌رێته‌ پێش و نه‌هێڵێ که‌ دوژمن له‌و که‌له‌به‌ره‌ که‌ڵک وه‌ربگرێ.
به‌ڵام سه‌ڕه‌ڕای ئه‌و وردبینی‌یه‌ سیاسیانه‌ی ناوبراو، تۆێژی کۆنه‌پارێزی ناو حیزب و سه‌رۆک عه‌شیره‌ته‌کانی ناوچه‌ له ئه‌ندێشه و بیری رادیکاڵی وی ده‌ترسان و ئه‌و ترسه‌شیان له‌ کۆبوونه‌وه‌و‌ دانیشتنه‌کاندا نه‌ده‌شارده‌وه‌ و پێیانوابوو که‌ بیری تیژی وی سه‌رئه‌نجام شۆڕشێک له‌و ناوچه‌یه‌ به‌رپا ده‌کا بۆیه‌ بوونی وی‌یان به‌ دژی به‌رژه‌وه‌ندییه‌کانی خۆیان ده‌ژمارد. 
کاک عه‌لی یه‌کێک له‌شۆڕشگێڕه‌ ‌ریئالیست و واقیع بینه‌کانی سێ ده‌یه‌ی رابردووی خه‌باتی نه‌ته‌وا‌یه‌تیی رۆژهه‌ڵاتی کوردستان بوو. ئه‌و مرۆڤێکی نه‌ته‌وه‌یی پێشکه‌وتوو بوو و له‌ کاتێکدا که‌ قازانج و به‌رژه‌وه‌ندیی نه‌ته‌وه‌ی کوردی زۆر لا‌ گرینگ و به‌رز بوو هاوکات رێزی بۆ مافی گه‌لانی دیکه‌ش هه‌بوو و پێی‌وابوو که‌ پاراستنی مافی گه‌لانی زۆر لێکراوی دیکه‌ گاڕ‌انتی و زه‌مانه‌تی پاراستنی گه‌لی ئێمه‌ ده‌سته‌به‌ر ده‌کا.
کاک عه‌لی خه‌باتکارێکی خاکه‌ڕا و بێ پۆز و ئیفاده‌ بوو و ئه‌و له‌ ناخی بنه‌ماڵه‌یه‌کی ره‌سه‌نی کورده‌واری رسکابوو و له‌سه‌ر ئه‌و بڕوایه‌ بوو که‌ هه‌ڵس و که‌وتی وی له‌ گه‌ڵ هاوڕێیانی و تاکی کۆمه‌ڵگا له‌ هه‌ل و مه‌رجی جۆراوجۆردا ده‌بێ به‌ شێوه‌یه‌ک بێ که‌ قه‌ت که‌لێن نه‌خاته نێوان که‌سایه‌تی وی و تا‌ک و کۆی کۆمه‌ڵگا.
کاک عه‌لی مرۆڤێکی به‌وه‌فا به‌ ڕێباز، ئازا، نه‌ترس ، له‌ خۆبووردوو‌ بوو.
له‌ بیرمه‌ کاتێک له‌ هاوینی 1980 دا سینگی به‌ پارچه‌ بۆمبێکی فڕۆکه‌کانی رێژیم زۆر به‌ سه‌ختی قه‌ڵه‌شابۆوه‌ و به‌ که‌ڵک وه‌رگرتن له‌ ئیمکاناتی ته‌شکیلاتی له‌ ناو جه‌رگه‌ی دوژمندا چاره‌ سه‌ر ده‌کرا، ئه‌وه‌ی لای وی بایخی نه‌بوو ترس و دوژمن بوون، ئه‌و هه‌موو کات به‌ڕوی مه‌رگ و ترس پێده‌که‌نی.
کاتێک له‌ زستانی هه‌مان ساڵدا به‌ هۆی هێندێک پیلانی ره‌نگاو ره‌نگ کاک عه‌لی و هاوڕ ێیانی مه‌جبوور بوون به‌ شێوه‌ی کاتی له‌ گوندی به‌ردێزی ناوچه‌ی سۆما جێگیر بن و کاتێک مه‌ترسی له‌ هه‌موو لایه‌ک را رووی له‌وان بوو، عه‌لی هه‌میشه‌ دیگوت که‌ ئێره‌ ده‌بێته‌” لێنینگڕاد” که‌س زه‌فه‌ری پێ نابا و ئه‌و هه‌میشه‌ یه‌کپارچه‌ وره‌ و ئیراده‌ بوو. ئیمانی پۆڵایین و وره‌ی به‌رزی وی هانده‌‌ر‌ی کۆڕی هه‌واڵان بوو.
کاک عه‌لی مرۆڤێکی له‌ خۆبووردو، جێگای بڕوا، ده‌ست و داوێن پاک بوو.
کاک عه‌لی له‌ کاتێکدا که‌ له‌ راده‌به‌ده‌ر ئۆگری بنه‌ماڵه‌ و خێزان و منداڵه‌کانی بوو، به‌ڵام تا مانگه‌کانی پێش شه‌هید بوونی زۆر به‌که‌می ده‌ره‌تانی دیداری بنه‌ماڵه‌که‌ی بۆ ‌ره‌خساو زۆر جار که‌ چاومان به‌یه‌ک ده‌که‌وت به‌ تاسه‌وه‌ ده‌یگوت که‌ چه‌ندین هه‌یوه‌” شۆڕش” وئه‌وانم نه‌دیتوه، ئه‌و له‌ کاتێکدا که‌ جه‌رگی بۆ بنه‌ماڵه‌و ماڵ ومنداڵه‌کانی ده‌سووتا به‌ڵام هه‌میشه‌ ده‌یگوت که‌ دایکی گه‌وره‌مان” نیشتمان” چاوی له‌ خه‌باتی ئێمه‌یه‌ و داخی دووری به‌ ناخی ده‌رونیدا ده‌برده‌ خوار.
کاک عه‌لی ئه‌گه‌ر ویستبای که‌ڵکی خه‌راپی له‌و پله‌ و پایه‌ی که‌ به‌ زه‌حمه‌ت و فیداکاری وه‌دستی هێنابوو وه‌ربگرتبایه‌، به‌ وه‌رگرتنی پاره‌ له‌ مافیا و بانده‌کانی قاچاغی ئه‌و ناوچه‌یه‌ له‌ ماوه‌یه‌کی کورتدا ده‌بوو به‌ ده‌وڵه‌مه‌ندێکی قورس، به‌ڵام هه‌میشه‌ پێکه‌نینی به‌ عه‌قڵ و هرزی ئه‌و جۆره‌ که‌سانه‌ ده‌هات و کێوی پاره‌ی له‌ به‌رانبه‌ر ئه‌رکی نه‌ته‌وه‌ی‌ی و سیاسی خۆیدا به‌ په‌له‌پووش داده‌نا.
کاک عه‌لی نه‌ته‌نیا جێگای بڕوا، به‌ڵکوو هه‌وێنی بڕوا و ته‌بایی و برایه‌تی کۆڕی دۆست و هه‌واڵانی بوو.
ئه‌وه‌ راسته‌که‌ دوژمن به‌ شه‌هید کردنی کاک عه‌لی خه‌با‌تکارێکی نه‌سره‌و‌توو و کۆڵنه‌ده‌ری له‌ گه‌له‌که‌مان و سه‌رکرده‌یه‌کی له‌ حیزبی دێموکڕاتی کوردستان و ره‌فیقێکی خۆشه‌ویستی له‌ ئێمه‌ و ئه‌ندامێکی به‌ نرخی له‌ بنه‌ماڵه‌که‌ی و مێردێکی مێری له‌ خێزان و باوکێکی جگه‌ر سۆزی له‌ منداڵه‌کانی ئه‌ستاند، به‌ڵام با باش ئه‌وه‌‌ بزانێ که‌ هزر و بیری نه‌ته‌وه‌یی کاک عه‌لی وه‌ک بوڕکانێک له‌ ناخی خاکی کوردستاندا مۆنج ده‌دا ‌و‌ رۆژێک ته‌خت و به‌ختی حکوومه‌تی کۆماری ئیسلامیی ئێران، له‌ بنه‌ره‌ت را ده‌سوتێنێ.
ره‌حیم محه‌مه‌دزاده‌
ئاگۆستی 2008ی زایینی