ته‌ها كرمانج

خه‌ڵکی : نه‌غه‌ده

له ‌دایکبووی : نه‌غه‌ده 1959

کاتی شه‌هیدبوون : 1994.01.04

شوێنی شه‌هیدبوون : چرۆمی تورکیه‌

شوێنی گڵکۆ : چرۆمی تورکیه‌

چۆنیه‌تی شه‌هیدبوون : تیرۆر

کادری کۆمیتە شارستانی نەغەدەی

یادێک له‌ شه‌هید ته‌ها کرمانج 

چارده‌ ساڵ له‌ مه‌و پێش له‌ رۆژی 4ی ژانویه‌ی 1994 دا شه‌هید ته‌ها کرمانج به‌ پێی پیلانی کۆماری ئیسلامی ئێران و به‌ ده‌ستی تیرۆریسته‌کانی ئه‌و حکوومه‌ته‌ له‌ شاری چڕۆمی تورکیه‌ شه‌هید کرا.
کاک ته‌ها پاش شه‌هیدان سمایل، سه‌لاح و مراد چۆارمین برای شه‌هید و به‌ شه‌هید میناوه‌ پێنجه‌مین شه‌هیدی بنه‌ماڵه‌که‌یه‌تی.

نابراو له‌ شه‌شی مارسی 1959 له‌ بنه‌ماڵه‌یه‌کی کورد په‌روه‌ر له‌ شاری نه‌غه‌ده‌ له‌ دایک بوو و له‌ ته‌مه‌نی 7 ساڵیدا رێگای قوتابخانه‌ی گرته‌ به‌ر و هه‌تا ئاخر ساڵ، له‌ هونه‌رستانی سه‌نعه‌تی درێژه‌ی به‌ خوێندندا. ئه‌و سه‌رده‌مه‌ هاوکات بوو له‌ گه‌ڵ راپه‌رین و خه‌بات دژی رێژیمی پاشایه‌تی له‌ ئێران و ناوبراویش وه‌ک گه‌نجێکی خاوه‌ن هه‌ست تێکه‌ڵ به‌ کۆڕی خه‌باتگێڕانی دژی رێژیمی پاشایه‌تی بوو.
ده‌سته‌به‌ر کردنی دێموکڕاسی وئازادی بۆ ئێران و گرینگتر له‌ویش گه‌یشتنی گه‌لی کورد به‌ ئازادی ومافه‌ نه‌ته‌وه‌ییه‌‌کانی جه‌و‌هه‌ری ئه‌سڵی بیر و هزری ناوبراو بوو، هه‌ر بۆیه‌ له ساڵی 1978 ی زایینی ‌له‌ گه‌ڵ ده‌ستپێکردنی هه‌وه‌ڵین تیکۆشانی سیاسی حیزبی دێموکڕاتی کوردستان له‌ شاری نه‌غه‌ده‌ ناوبراو پێوه‌ندی به‌ حیزبه‌وه‌ گرتوو له‌ ساڵی1979 ی زایینیدا ره‌سمه‌ن وه‌ک ئه‌ندامی حیزب له‌ ناوچه‌ی نه‌غه‌ده‌ ده‌ستی به‌کار کرد.
نابراو زۆر له‌ بیری خۆ پێگه‌یاندن و په‌روه‌رده‌ کردنی خۆیدا بوو، بۆ ئه‌و مه‌به‌سته‌ش هه‌میشه‌ جانتاکه‌ی چه‌ند کتێبی تێدا بوو، ئه‌و زۆر زوو وه‌ک کادری ته‌شکیلاتی به‌ خه‌ڵکی ناوچه‌ ناسێندراو جێگای شیاوی خۆی له‌ناو خه‌ڵکدا دیته‌وه‌. ئه‌و له‌ ساڵی 1981 هه‌تا 1985 وه‌ک ئه‌ندامی کۆمیته‌ی شارستانی نه‌غه‌ده‌ له‌و ناوچه‌یه‌ خزمه‌تی کرد و له‌ ئاخری 1985 نه‌قڵی فێرگه‌ی سیاسی نیزامی کرا له‌وێ وه‌ک مامۆ‌ستا ده‌ستی کرد به‌ په‌روه‌رده‌ کردنی ئه‌و که‌سانه‌ که‌ تازه‌ به‌رگی پێشمه‌رگایه‌تیان ده‌پۆشی و له‌و سه‌نگه‌ره‌شدا زۆر سه‌رکه‌وتووانه‌ هه‌تا ساڵی 1988 خزمه‌تی کرد. له‌ ساڵی 1988 وه‌ نه‌قڵی ده‌بیرخانه‌ی حیزب کراو وه‌ک کادری ده‌بیرخانه‌ و ئه‌ندامی پێوه‌ندییه‌ گشتییه‌کان تا ماوه‌یه‌ک پێش شه‌هید بوونی له‌و به‌شه‌دا درێژه‌ی به‌ خزمه‌ت دا.

کۆست‌که‌وتنه‌‌ بێ پسانه‌وه‌کانی، وه‌ک شه‌هید بوونی کاک سمایلی براگه‌وره‌ی له‌ به‌هاری1979 ، سه‌لاحی برا بچووکی له‌ به‌هاری 1983، مینای برازای له‌ هاوینی 1984 و مرادی برا بچووکی له‌ هاوینی 1985 له‌ کاتێکدا که‌ برینێکی قووڵ و ناسۆرێکی به‌ ئێشیان له‌ سه‌ر جه‌سته‌ی وی به‌ جێ هێشتبوو، له‌ هه‌مان کاتیشدا کارتێکه‌رییه‌کی گه‌و‌ره‌یان له‌سه‌ر بیرو هرزی وی بۆ درێژه‌ی خه‌بات تا گه‌یشتن به‌ ئامانجه‌کانی گه‌لی کورد دانابوو، هه‌ر بۆیه‌ ناوبراو سه‌ره‌ڕای هه‌ڵگرتنی کۆڵه‌باری قورسی له‌ ده‌ستدانی ئازیزانی بڕیاری لێبڕاونه‌ی خۆی بۆ درێژه‌ پێدانی رێگای شه‌هیدان دابوو.
ناوبراو کادرێکی به‌ دیسیپلین، دێموکڕات، ئازاد مه‌نش، سازمانده‌ر، ماندوو نه‌ناس و له‌ خۆ بووردوو بوو. ئه‌و ئێش و ئازاره‌کانی بێ به‌شیی گه‌له‌که‌ی به‌ هه‌موو وجووده‌وه‌ هه‌ست پێ ده‌کرد و بۆیه‌ شانۆکانی وی که‌ له‌ بۆنه‌ جۆراوجۆره‌کانی حیزبدا ده‌هاتنه‌ سه‌ر سه‌کۆی شانۆ، ئاوێنه‌ی نیشاندانی ده‌رد و مه‌ینه‌ته سیاسی و کۆمه‌ڵایه‌تیه‌کانی گه‌له‌ به‌ش خوراوه‌که‌ی‌ بوون. 
تێپه‌ڕ کردنی قوناغه‌ جۆراوجۆره‌کانی ته‌شکیلاتی، وه‌ک کادری ته‌شکیلاتی، ئه‌ندامه‌تی کۆمیته‌ی شارستان، مامۆ‌ستایه‌تی زانکۆی سیاسی نیزامی، کادری به‌شی پێوه‌ندییه‌کان و ده‌بیر خانه‌ و کار له‌ زۆر شوێنی گرینگی دیکه‌ش، کردبوویانه‌ کادرێکی به‌ ئه‌زمون و قاڵ بووی‌ کووره‌ی خه‌بات.
ناوبراو به‌ هۆی ئه‌وه‌ی که‌ ده‌ستێکی باڵای له‌ ئاشکرا کردنی رایه‌ڵکه‌ جاسووسییه‌کانی کۆماری ئیسلامی ئێران، له‌ کوردستانی گه‌رمین هه‌بوو و پیلانه‌ دژی گه‌لییه‌ کانی لێ پووچه‌ڵ ده‌کردنه‌وه‌ که‌وتبووه‌ به‌ر رقی تایبه‌تیی تۆڕی تیرۆری حکوومه‌تی ئێران و له‌ رێزی ئه‌و که‌سانه‌دا بوو که‌ ده‌بوو له‌ لایه‌ن تیرۆریستانی‌ دڵ ره‌ق تیرۆر بکرێ، بۆیه‌ کۆماری ئیسلامی به‌ دیاری کردنی کوردێکی خۆفرۆشی ویژدان و شه‌ڕه‌ف لێ بزر بوو به‌ ناوی خالید ئه‌حمه‌دی ناسراو به‌ خالید کۆڵوو، خه‌ڵکی گوندی په‌سوێی ناوچه‌ی پیرانشار، خه‌ریکی وه‌کۆ کردنی زانیاری له‌سه‌ر ناوبراو بوو. 
ته‌های شه‌هید چه‌ند مانگ پێش شه‌هید بوونی ئاگاداری و زانیاری وردی له‌ سه‌ر پیلانه‌کانی رێژیمی تیرۆریست په‌روه‌ری کۆماری ئیسلامی ئێران له‌ سه‌ر خۆی پێ گه‌یشتبوو و باش ده‌یزانی که‌ له‌ لیسته‌ی تیرۆری کۆماری ئیسلامی دایه‌ و ده‌یزانی که‌ رێژیم کێ و چه‌نده‌ی پاره‌ بۆ ئه‌و مه‌به‌سته‌ ته‌رخان کردووه‌. ئه‌و به‌ یارمه‌تی ته‌شکیلاتی حیزب و دۆستانی جوڵانه‌وه‌ و زیره‌کی خۆی چه‌ند جار پیلانی تیرۆریسته‌کانی کۆماری ئیسلامی ئێرانی له‌ کوردستانی گه‌رمێن به‌ تایبه‌ت له‌ شاری” ڕانیه”‌ پووچه‌ڵ کرده‌وه. 

ناوبراو بۆ پوچه‌ڵ کردنه‌وه‌ی پیلانی رێژیم به‌ مه‌شوه‌ڕه‌ت و بڕیاری رێبه‌رایه‌تی حیزب رێگای هه‌نده‌رانی گرته‌ به‌ر و بۆ ئه‌و مه‌به‌سته‌ خۆی گه‌یانده‌ وڵاتی تورکیه‌ و له‌وێ خۆی به‌ به‌شی په‌نابه‌رانی سازمانی نه‌ته‌وه‌ یه‌‌کگرتووه‌کان ناساندو چه‌ند مانگ چاوه‌ڕۆانی ده‌رباز بوون بۆ وڵاتی سێهه‌م بوو، به‌ڵام ده‌ستی ره‌شی تیرۆری کۆماری ئیسلامی هه‌ر به‌ دوایه‌وه‌ بوو له‌وێش له‌ کۆڵی نه‌بۆوه‌، تا سه‌رئه‌نجام له‌ کات ژمێر سێی پاش نیوه‌ڕۆی 4 ی‌ ژانوییه‌ی 1994 له‌ دو سه‌د مێتری ماڵی خۆی له‌ شاری چرۆمی تورکیه‌ تیرۆر کرا.
نابراو خێزاندار بوو هاوسه‌ر و پێنج منداڵ سێ کچ و دوو کوڕی له‌ پاش به‌ جێ ماوه‌.
ته‌رمی ناوبراو له‌ نێو شه‌پۆلی ده‌ریای خه‌م و په‌ژاره‌ی بنه‌ماڵه‌ و دۆست و هاوڕییانی له‌ گۆڕستانی ” باتی که‌ند” ی ئانکارا به‌ خاک ئه‌سپێردراوه‌.

یادی هه‌ر پیرۆز و رێگای پڕ رێبوار بێ.
نه‌مان بۆ حکوومه‌تی تیرۆریست په‌روه‌ری کۆماری ئیسلامی ئێران

شه‌هاب2008.01.04